پەیامی پیرۆزبایی نەورۆز و سەری ساڵی نوێی 2721 کوردی
نیشتمانی داگیرکراو ساڵی نوێی نییە
بووکی ڕازاوەی وڵات، گەزیزەی ژاکاو
ببلوێری ژیان ناسازو مۆسیقای کوردستان بێ ناز
ئەوە ئەمساڵیش، هەر وەکوو بەرێ، لە سات و کاتێکدا بەرەوپیری نەورۆز و سەری ساڵی تازەی کوردەواری دەچین، کە دێوەزمەی تاریکی و شەوەزەنگ، باڵی بە سەر خۆر و ڕووناکیدا کێشاوە، بێ هیوایی و هەژاری، تاروپۆی کۆمەڵگای تەنیوە، دەسەڵات ڕۆژ لە دوای ڕۆژ، هارتر، زوڵم گێشتوتە لوتکە، ئێش و ئازار هەتا سەر ئێسکان.
سەرەڕای هەمووی ئەم ئازارانەش، بە خۆشحاڵیەوە نەتەوەی کورد، لە ڕۆژهەڵاتی کوردستان لەوپەڕی هۆشیاری نەتەوەیی دایە، کە جێگەی شانازی و دڵخۆشییە. هەر لە ئیلامەوە تا ماکۆ، ویستی سەربەخۆیی خۆازی نەتەوەی کورد، بۆتە مۆتەکەی ڕۆحی ڕژیمی ئێرانی جەعلی.
ئێمە وەکوو بزووتنەوەی هیوا، ئەمساڵ گەلی خۆمان دڵنیا دەکەینەوە، کە بە گڕوتینێکی لەبن نەهاتوو، بە هەموو توانامانەوە، خەبات و تێکۆشانی خۆمان لە ڕۆژهەڵاتی کوردستان، بەرز بکەینەوە، سۆز و بەڵێن دەدەین، گەل بێ هیوا نەکەین.
نەورۆز و سەری ساڵی نوێی کوردی، لە هەموو کورد و کوردستانیانی هێژا پیرۆز بێت، هەر بمێنن بە شادی و کامەرانی.
ئەنجومەنی بەڕێوەبەری بزووتنەوەی هیوا
29ی ڕەشەمەی 2720
19.3.2021
