جەلیل ئازادیخواز
”گەمارۆی شاخوازاەكان و ڕزگاركردنی شۆڕش”
ئێستا ئیتر بە ڕوونی و ڕاشكاوی سنووری نێوان گەلانی شۆڕشگێڕی بن دەستی ئێران و دیسكۆرسی فاشستی شاخوازەكان دەركەوتووەو بەرجەستە بووەتەوە. ئەم ڕێچكە فاشستە لەهەموو ڕووبەر وڕەهەندەكاندا، بە هەموو میكانیزمێكی نەشیاو و دوور لە پرێنسیپ و موراڵ كەوتوونەتە بنكۆڵكردنی شۆڕشی ژیناو سەپاندنی هژمۆنی فاشستانەی خۆیان. چوارمانگە لە ساردكردنەوەی شۆڕش و جەماوەری شۆشگێڕ و ڕاپەڕیوی كوردستان و ئێران درێغیان نەكردوە. لە ڕێگا سازدانی كەشێكی هەوری درۆیانەی دوور لە واقع و بە ڕێگای دوو میدیای ( ئێران ئینترنشناڵ و من و تۆ)وە، هەروەها لەڕێگا سۆسیال میدیاو دەست و پێوەندەكانیانەوە. توانیان دابڕان بخەنە نێوان گەلانی ئێران بە كورد و تورك و عەرەب و بەلووچەوە. تاوتینی شۆڕش بگرن و پەتای ناباوەڕی بە یەكتری لە نێوان ئەم گەلانەدا رەواج بدەن. هەردوو بلندگۆی ناوبراو بە داڕشتنی سیاسەتێكی میدیایی دژە شۆڕش و گەلانی ئێران. هەوڵیاندا وای وانوێنەبكەنەوە، كە توانیویانە بەشێ لە حیزبە سیاسیەكانی كوردستان لە گەڵ خۆیان و دیسكۆرسی شاخوازی و پرۆژەی سیاسیان هاوڕاو هاوهەنگاو بكەن. ئەم دۆخە نەك دابڕانی لە نێوان كۆمەڵگای مەدنی كوردستان و حیزبەكاندا زیادتر كرد، بەڵكو بێ باوەڕی و چەند فاقیشی ڕەخساندووە. لە سەر ئاستی گشتیش دابڕان و دڵساردی گەوورەی لە نێوان گەلانی بن دەستی ئێران و نەتەوەی كورددا دروستكردووە. هەڵوێستی ڕەزا پالەویش زێدەی سەر ئەم باسانەیە. لەم دۆخەدا پێویستە ڕاستەو خۆ هەر ئێستا كورد و نەتەوەكانی بن دەستی ئێران ئەم كارانەبكەن.
یەك ؛ هەموو خۆ پیشاندان و چالاكیەكانیان لە دەرەوەی وڵات بە تەنیاو جیالە شاخوازەكان ئەنجام بدەن، بە هیچ جۆرێ ڕێگایان نەدەن بێنە ناو چالاكی ئەمان و خۆشیان نەچنە ناوهیچ چالاكیەكی ئەوان.
دوو؛ بایكۆتی هەردوو مینبەری دژە شۆڕشی ئێران ئینتر نشناڵ و مەن و تۆ و هەر میدیایەكیان بكرێت.
سی؛ هیچ سەرۆك حیزب و كادر و سیمایەكی ناسراوی كورد لە و بڵندگۆیانەوە دەرنەكەوێت. دەركەوتنیان نیشانەی تەسلیم بوونە بە سیاسەت و ستراتیژی و گوتاری شاخوازیە، مەگەر گۆڕانی بنەمایی و ستراتیژی لە خۆیاندا بكەن.
چوار؛ لە هەموو شارو وڵاتانی دەرەوە، ڕەوەندی كوردستانی و گەلانی ئیران و بەریانە دیموكاتەكان، شاندو نوێنەری خۆیان بۆ شۆڕشی ژینا ڕێكخەن و بە جیا دیداری ناوەندەكانی دەسەڵات و كۆمەڵگای مەدەنی و ڕێكخراوەكانی ئەو وڵاتانەبكەن. بێ هاوبەشی شاخوازەكان و بەجیا
پێنج؛ پێویستە حیزبەكانی كورد وەك كۆمەڵگای مەدەنی كوردستان لە ڕێگای مینبەری فەرمی حیزبەوە هەڵوێست و دژایەتی خۆیان بۆ ئەم تاقمە ڕاگەیەنن.
شەش؛ هەموو هێز و تاكێكی كورد هەر لەئێستاوە دەبێ لە سەر دووئاست هەوڵبدات هەم بەرەیەكی بەرینی كوردستانی سازبكات و هەم بەرەیەكی بەرینی نەتەوە بن دەستەكانی ئیران و هێزە دیموكرات و سكۆلارەكان.
ڕێچکەی شاخوازەکان لەم ڕاستیە گەشتوون ،کە ناتوانن وەک هێزێکی سیاسی جەماوەریی کە پێگەیەکی فراوانی کۆمەڵایەتی هەیەو ڕووبەریکی گونجاو لە کۆمەڵگا دەستەبردەکات بجوڵێنەوە لەڕاستیدا ئەم بەریانە لە ڕووی کۆمەڵایەتەوە پیر و تەریکەو لە رووی کولتووریەوە چاولە رابردوو کۆنەخوازە هەتا هەڵگری کولتووری دژەتاک و ئازادیە بنەمایەکانی تاکە. ئەمە نەک تەنیا خۆیان دەزانن بەڵکو ئەو هێزانەش کەچاویان لەمانە ئەم ڕاستیە رەهایە دەزانن.هەرلەم سۆنگەوە و بۆ قەربووکردنەوەی ئەم کەمایەسی و خەسارانە کۆمەڵيک تاکتیک و میکانیزم بەکاردێنن کە بریتین لە؛ قاوسالاری و ئاپوورە یا پۆپۆلیزم و رەواجی ئەدەبیاتی فاشستی. لە پاڵ ئەمانەش دا بەڕاشکاویی و روونی دەزانن کورد لە هەردوو رەهەندی مەعریفی و هێزی مەیدانیدا سەرکردایەتی و رێبەرایەتی ئەم شۆڕشەدەکات. سەرەتا دەستیان کرد بە لێدانی مەعریفی شۆرشەکەو دروشمی /ژن /ژیان/ئازادی/ بە بەرامبەرسازی دروشمی /پیاو / وڵات ئاوەدانی/ ئەم دروشمە هەرزوو بەهۆی هەناوی کۆنەخوازانەی دژ ژن بوون و ئازادی پاشەکشەیکرد. لە مێژیشبوو کەوتبوونە خۆ رێکخستنی میدیایی لە رێگای تیڤیەکانی {ئێران ئینترنشنال و مەن و تۆە} بۆیە بە ستراتیژیەکی دارێژراو و پرۆژەیەکی سیاسی کولتووری بیرلێکراوە کەوتن لێدانی شۆرشی ژیان و ڕاپەرێنی کورد و نەتەوەکانی ئێران.لە هەمانکات دا هەموو هەوڵی خۆیان خستە گەڕ بۆ ڕاکێشانی هێزەسیاسیەکانی کورد زۆر بەدیاریکراوی دوو هێزی ناوەندی هاوکاری بۆ ناو ئەم تیڤیانەو گۆشکردنیان بە ئەدەبیات و پرۆژە سیاسی خۆیان. لەماوەی شۆرشی ژینادا بە کۆیە پرۆژەو میکانیزمی جیاواز هەوڵیاندا کە کورد بکەن هاوپەیمانی خۆیان. لێرە وە دەیان ویست بەکورد هەم خۆیان بکەن هێزی کۆمەڵایەتی و هەم هەموو نەتەوە و هێزەکانی ئێران بگەیەننە ئەم رایەی کە هەموو گەلانی بن دەست و هێزەکان وەک شاخوازەکان بیردەکەنەوە، ئەهوازی عەرەب و ئازەری و بەلوچی پێ رکێف کێشی ناو پرۆژەی خۆیان بکەن. سانسور و سڕینەوەی دروشم و سمبولە نەتەوەیی و نیشتمانیەکان و زاڵکردنی ئەدەبیاتی شاخوازی سیاسی بە سەر دۆخ و کەشەکەدا ، دڵ ساردی و تەریک کەوتنەوەیەکی زۆری لە کۆمەڵگای مەدەنی و لە نێوگەلانی ئێراندا لە کوردو لە شۆرش دروستکرد. بۆیە پێویستە ئەو
دوو لایەنە هەڵوێستی روونیان بۆ ئێران و جیهان و کۆمەڵگای مەدەنی کوردستان هەبی، وەگەرنا ئیتر کۆمەڵگای مەدەنی کوردو ئەو لایەنانەی گەلانی ئێران دەبێ خۆیان لە دەرەوەی ئەو هێزانە بجوڵێن و بەرەی خۆیان سازکەن ،کە بەستێنێکی شیاو ئامادەشی هەیە.کۆمەڵگای مەدەنی کوردستان و چالاکان بۆ دروستنەبوونی دووفاقی لەنێوکورددا تا هەنووکە هەڵیانکردووەو ئێستا ئیتر کاسە پربووە. ناکرێت ئەم دۆخە بەم جۆرە بۆ ئەم بەریانە فاشیستە خاڵی بکرێت. پرۆژەی سلەبریتی سازیش یەک لە میکانیزمە نەزۆکانی بەریانی شاخوازیە کە دەبێ وڵامی گونجاو بگرێت
