پەیامی پیرۆزبایی نەورۆز و سەری ساڵی کوردی
نەورۆز، هێمای ئەوین و ئازادی، ڕەمزی سەرکەوتن و جەژنی خۆشی، کۆتا شەوی زستان و موژدەی بەهار و شادی، ئاگری سەرهەڵدان و هێزی پاکژکەرەوە، تێکشکانی شەوەزەنگ و هاتنی ڕووناکی، سەرە ساڵی نوێی 2720 کوردی لە هەموو گەلی کورد و کوردستانیانی ئازیز و خۆشەویست پیرۆز بێت.
بەدرێژایی مێژوو نەورۆز بۆ گەلی ئێمە تەنیا گۆڕینی وەرزەکان نەبوە، بەڵکو هێمای خەبات و سەرهەڵدان لە دژی دەسەڵاتە ئەهریمەنەکانی سەردەم دابوە، نەورۆز بۆتە بڵێسەی ئاگری خەباتی گەلەکەمان بۆ ڕزگاری و ئازادی نیشتمان و زێد و خاکمان.
نەورۆز کۆنترین جەژنی مرۆڤە لە سەر گۆی زەوی و لە کوردستانیشەوە بەرەو ناوچەکانی دیکەی ئاسیا بڵاوبۆتەوە. نەورۆز تا ئێستا وەکوو سمبولی کورد، بە تەنیا شانی وەبەر هەموو ئەو چاندە زاڵانەی نەتەوەی سەردەستداوە، تاکوو کورد و کوردستانیان بەدەست ئەهریمەنەکان لەناو نەچن.
گەلی کوردی ئازیز و هاونیشتمانیان خۆشەویست، ئەمساڵ جێاوازتر لە ساڵانی رابردوو بەرەو نەورۆز و وەرزی بەهار هەنگاو دەنێین، کە بەداخەوە خەڵکی ئازادیخواز و زەحمەتکێشی کوردستان، کەوتوونەتە بەر شاڵاوی تەشەنەی نەخۆشی ڤایرۆسی کۆڕۆنا و تێدا خەسارمەند بوون. زۆرێک لە هاونیشتیمانیانمان، ئازیزانی خۆیان لە دەستداوە، هەر بەو بۆنەشەوە سەرخۆشی خۆمانیان ئاراستە دەکەین و سەرساغی بۆ بنەماڵە بەرێزەکانیان ئاوات دەخوازین.
هاونیشتمانیانی بەڕێز و هێژا سەرەڕای هەموو سەختی و نەهامەتێکان ، ئاسۆێکی ڕوون چاوڕاونی گەلەکەمان دەکات و دەسەڵاتی فاشیزمی مەزهەبی ئێران لە هەموو لایەکەوە کەوتۆتە بەر گۆشار و داڕمانی یەکجارەکی ، هەر بۆیە دەتوانین بڵێین ئەمە دواهەناسەکانی ئەهریمەن و شەوەزەنگە ، کە ڕووناکی بەسەر تاریکیدا زاڵ دەبێت.
پێکەوە ژیان و ژیانی هەرەوەزی ، کە وەکوو نەریتێکی دانەبڕاو ، بنچینەی کوردستانیان بوە و ئێستاش لەم بارودۆخە سەخت و دژواردا ، هەر ئەمە چاوەڕوان دەکرێت کە بە یەکڕیزی و یەکگرتوویی، ئەم قۆناغەش دەرباز بکەین و پێکەوە بەرەو بەهاری ئازادی هەنگاو بنێین .
هەر بژین بە شادی و خۆشی و نەورۆزتان پیرۆز
بزووتنەوەی هیوا
نەورۆزی 2720 کوردی
